البارحه .. أبحرت مع الهواجيس
وصرت أدُوُر مع التفاكير في هالدنيا
قصيده جديده .. ولحظات صمت ....... أخليكم معها
البارحه يـوم الهجـوس احتوتنـي
واصبحت في دنيـا التّفاكيـر دوّار
فكره على مقطورة الصّمت جتنـي
ويسوقها خيلٍ على سكّـة الـدّار
وقّفتهـا يـوم انّهـا واجهتـنـي
وتقدّرت معها صواديـف الاقـدار
يوم المشاعـر والسّنيـن اوهمتنـي
صدق الشّعور اللي كذب فيه شعّار
أسكت واحس ان المشاعر دعتنـي
أحكي لها جرح العمر والذي صـار
شلت الحياة بكبرهـا فـوق متنـي
همٍّ من اسباب البشر منـه محتـار
أحوالهم عقـب التّبسّـم خذتنـي
للضّيقه اللي في ضميري كما النّـار
الوقـت مـر وساعتـي موقفتنـي
واخذ يمين مـن التّفاكيـر ويسـار
مرّات اقول ان المصايـب خذتنـي
دوّامـة الدّنيـا منافيـذ واسـوار
ومرّات اقول ان الهمـوم اوقعتنـي
في ساحة الضّيقه بلا باب وجـدار
يا ضربةٍ فـي راسـي وموجعتنـي
للعالم اللي بـه كثيـرات الاسـرار
أيّامـي اللـي عشتهـا علّمتنـي
انّ الحياة ابها سلامـات واخطـار
ما كل مـدّة كـف لـي ريّحتنـي
بعض اليدين تمد من نـاسٍ قشـار
هذي الحياة اللي خذتنـي عطتنـي
فكره تجسّد لي جزيـلات الاشعـار
جنّبتهـا مـا دامهـا خالفتـنـي
وما دام لي قبرٍ ومعـروف الاشبـار
والفتنه اللي شفتهـا مـا عمتنـي
أخطيت لوّي شفتها قاصـر انظـار
لاشك في شـك الهمـوم اوقعتنـي
حتّى غرقت جروح واوجاع واضرار
والسّاعه اللـي عقـب ذا نبّهتنـي
دقّت وانا في سجّتي راكب قطـار
دجت الحياة اللي ذكرت ونستنـي
حتّى وصلت اللي وصلته من اقطار
انهـدّ حيلـي والهواجـس قوتنـي
والصّمت عندي لحظة افكاري شعار
كـل الثّوانـي بالمكـان حبستنـي
بين السّكوت وصرخة الصّمت ثرثار
يوم انتبهـت لسجّتـي وايقضتنـي
غفوة مصاديع العقل جملـة افكـار
واليوم بعد الليلـه اللـي جفتنـي
قلت اه لكن حيلتي ذنب واعـذار